佘詩曼、譚耀文、陳煒 、許紹雄、馬貫東等主演嘅新劇《正義女神》，官方於12號釋出佘詩曼嘅角色預告片，約2分鐘嘅影片中，透露出佘詩曼所飾演嘅言官言惠知，點解會由高等法院嘅現任法官，自願轉到少年法庭當法官嘅原因。
預告片中，言惠知覺得因為自己一次「誤判」，撤銷咗一個少年罪犯嘅控罪，令到一個惡魔少年逍遙法外。為咗承擔自己所犯嘅錯，為咗阻止下一個惡魔少年嘅出現，為咗堅守自己心中嘅正義，言惠知決定喺源頭杜絕少年犯罪。
《正義女神》係許紹雄嘅遺作之一，而喺今次嘅預告片中，除咗有佘詩曼判案嘅颯爽英姿外，仲有佢對住許紹雄解釋自己開庭嘅規矩，同埋堅持自己認為啱嘅事。預告片一出，唔少網民都留意表示相當期待，仲讚阿佘無論眼神定氣場都相當有法官范，亦有網民留言指見到Benz雄嘅演出後，相當懷念呢位演技精湛嘅綠葉。
