孫燕姿相隔12年終於重返香港開演唱會，佢兩場喺啟德主場館舉行嘅《就在日落以後》巡迴演唱會香港站，首場就喺13號晚舉行。由於演唱會門票一早售罄，所以想入場睇騷嘅星爺周星馳就決定出「蕉」搞掂演唱會門票問題！
星爺喺社交平台上載咗一張同孫燕姿「友好」交流嘅照片，相中佢戴住孫燕姿巡唱嘅周邊cap帽，再笠上肉色絲襪，以手中香蕉挾持孫燕姿；而被香蕉架頸嘅孫燕姿亦相當配合，做出舉高雙手嘅投降狀態，雙雙完美重現星爺喺電影《家有囍事》中，打劫 張曼玉 嘅一幕。
星爺喺帖文中表示：「孫燕姿演唱會預售被搶購一空，我也是為世所迫才打劫演唱會門票，小朋友切忌模仿。最後我搶到10張票，我不難過了，懶得去管對錯，我很愉快。」孫燕姿亦有於限動中轉發帖文，並留言回覆：「星爺不必太空蕉挾持，票照樣送到門口！🤩🤩🤩我今晚要pretty woman了。Can’t wait to see you all !!!」
