《中年好聲音4》導師分組賽來到最後一回合，今集三隊學員要輪流挑戰那英、張學友同張惠妹嘅經典歌，爭取30強晉級席位。今集唱將盡出，競爭激烈，為咗脫穎而出，科亞高巴出動殺手鐧挑戰唱中文歌《吻別》，對撼同樣演唱張學友嘅強敵范子睿。
myTV SUPER重溫《中年好聲音4》賽事
參加比賽最驚就係身體出狀況，好似袁帥話自己已經病咗10日，比賽當日仲食緊藥，要演繹那英高難度金曲《白天不懂夜的黑》，唔知會唔會影響佢嘅發揮。
吳亦偉諗起自己為咗追夢要犧牲同屋企人相處嘅時間，都忍唔住淚灑舞台，尤其為咗比賽要台灣香港兩邊飛，幾乎冇時間見到仔女同太太，覺得好內疚。同樣唱到喊嘅仲有尤淑情，佢仲搞喊咗三位女評判肥媽、海兒同谷婭溦。尤其肥媽因為憶起天上嘅亡夫幾乎喊到收唔到聲。
