TVB經典劇《阿Sir早晨》演員聚會敘舊，勾起無數觀眾集體回憶，吳家樂噚日喺IG貼出三張合照，相中見簡佩筠、周文淇及古天樂等，仲有圈中好友車婉婉及何遠恆，吳家樂笑稱呢班「同學仔」每次聚會都笑到肚痛，亦多謝古老闆請食飯，同介紹新朋友同合作機會。
唔少網民見到息影多年嘅簡佩筠同周文淇感到好驚喜，周文淇當年劇集《阿Sir早晨》飾演黎明細佬「祝小安」，佢同古仔係訓練班同學，早年轉型做廚師，周文淇廚藝了得，曾出烹飪書及網上教煮餸，獲唔少圈中人支持。
而簡佩筠喺劇集飾演黎明細妹「祝中平」、其劇中男朋友係「陸建材」古天樂，簡佩筠於90年代初入行，1997年息影後，經商之路充滿波折，曾經營美容生意，本已計劃將公司上市，卻被生意夥伴出賣，以合併業務方便上市為由，要求佢轉讓商標，豈料對方竟然私下將品牌賣畀上市公司，最後弄得血本無歸，簡佩筠更慘遭前拍檔騷擾，導致兩度流產，醫生告知其懷孕機會極微，近乎終身不育，由於其丈夫Justin係九代單傳，對佢同家人打擊好大，幸好丈夫Justin一直不離不棄，陪伴佢走過人生低谷，一齊重新成立新品牌，勇闖商界。
此外，何遠恆早年因與李彩華拍拖而再現娛樂圈，二人分手後，何遠恆再次消失於人前，喺內地發展冷氣生意，今次罕有與《阿Sir早晨》演員重聚，見佢身形明顯比之前Fit咗。
