慈善節目《博愛歡樂傳萬家》即將舉行，呢日 太極樂隊 阮浩棕 黃建東 鍾舒漫 同多位聲秀歌手，一齊參與記者會，首次參與大型節目司儀工作嘅Nic，就對今次機會既緊張又興奮喇。佢仲話有 森美 麥美恩 同 陳庭欣 等拍檔，一定要好好學習同汲取經驗喇。而東東就笑指自己參加完《中聲4》後，發現主持工作更適合自己咁話喎。
而Sherman將同幾位聲秀後輩組成限定女團演出，仲會同IdG Bubbles合作，呢日大家就話要同真女團成員嘅少女們合作有唔少壓力，Sherman仲自嘲話只能夠盡力融入唔諗太多喇。
太極5月就會展開40周年演唱會，已積極準備嘅佢哋被問到如果成員間揀歌有意見會點決定，佢哋就笑言會交俾已故嘅成員Gary Tong指示喇。 黎展峯 所屬嘅公司將舉行25周年演唱會，而佢想同新加入師兄 周國賢 合作嘅心願有冇機會達成呢？呢日佢就親自回應喇。