導演 張之亮 呢日出席《第四屆香港流行文化節》嘅對談會，佢99年執導嘅電影《流星語》4K修復版下個月將會放映，張導演話拍呢部戲時，咁啱遇上金融風暴，哥哥象徵式收咗一蚊片酬參演，希望同業界共度時艱，不過當年哥哥嘅好意就惹嚟唔少閒言閒語，有人甚至覺得佢係為咗出風頭，張之亮導演就覺得呢啲陰謀論，令哥哥受咗唔少委屈，好戥哥哥不值。
拍呢部戲時哥哥已經係巨星，但係張之亮導演就大讚哥哥一啲架子都無，尤其同小演員合作時，仲感受到哥哥好有愛，張導演話哥哥好識得同小演員相處，有時為咗同小演員培養下感情，仲特登會早到片場，拉近彼此嘅距離。
當年為咗拍呢部戲，張之亮導演曾負債累累，雖然債台高築，但好彩一切都事過景遷，最後都還清晒所有債務。
