一講起香港的士，各位朋友就一定有唔少意見喇，「長唔去短嫌棄海唔過得」相信係唔少乘客嘅印象，亦有人認為紅色跑車嘅車手速度極快，不過近年政府各部門已著手提出唔少方法改善，好似下月起就規定司機需要有唔同電子支付方式等等。
喺香港各區見到紅色的士一啲都唔出奇，不過近日就有一位研究香港開埠初期歷史嘅嘅日本網友，於東京澀谷地標澀谷109外，見到一部金豐市區的士，更有當地網友即時放上網，以為自己穿越嚟咗香港，非常驚訝。而望真啲，落車嘅師傅更係創作過無數經典金曲嘅資深音樂人 陳少琪 ，佢嘅社交平台仲有片有相，有乘客仲問佢過唔過海，而佢就話自己盪失路接唔到客人無法做生意，非常入戲。
陳少琪仲喺Post寫道：「雖然鍾意車，但係開車搵食我都係無天分。」佢社交平台就連兩個轆嘅單車，到落場賽車嘅相都有，果然係愛車一族。
其實呢架有齊車頂燈箱、車內有計程錶同「暫停載客」紙牌冚晒旗嘅的士，有晒日本當地車牌，其實除咗東京之外，多倫多、台灣甚至澳洲，都有朋友收藏或「復刻」香港的士當成私家車使用，唔止旅客同當地人見到有驚喜，相信旅居當地嘅港人朋友亦一定非常有親切感。
