上映至今已超過兩個半月嘅《尋秦記》，票房截至星期六已達9680萬港元，電影公司週末特別安排主角項少龍 古天樂 同烏廷芳 宣萱 CP出動謝票，各謝票場次都於3分鐘內售罄，威勢未減。
古仔同Jessica呢對歡喜冤家CP再次出動，答謝觀眾一直以來對《尋秦記》嘅支持，氣氛熱鬧。兩人繼續鬼馬風趣對答，令戲院現場充滿歡樂氣氛，宣萱更充當fans攝影師，為古仔同fans拍片。當中亦有包括小朋友跟住家人一齊追星，其中更有一位打扮成小秦王，成功吸引向古仔目光，於現場挑選觀眾送紀念品環節時被選中，古仔更抱小秦王到台前答問題。
萱萱同古仔對電影上映以來一直反應熱烈非常高興：「我們趁有時間連續兩日謝票，唔少Fans由12月尾上映到而家，已睇咗不下幾次，真係非常捧場，更有朋友由世界各地而來支持我哋，又要搭飛機又要book酒店。面對呢班Fans，你會睇得出佢吔自劇集《尋秦記》廿幾年來，仍喜歡同投入呢個故事 ，同自己一齊成長，呢份支持好難得。」
古仔對有家長將自己小孩打扮成小秦王亦非常讚賞：「雖然呢位3歲小秦王未必識我同宣萱，或者秦王係邊個？不過家長願意花呢份心思支持，令我更加開心。」
至於觀眾特別喜愛龍芳呢對CP，會否打算拍攝「CP」外傳延續呢份氣氛，古仔就不置可否話：「呢個世界咩事都可能發生，或者可以考慮一下！」
《尋秦記》重播 星期一至五晚 23:55 翡翠台