一向喺跑步發燒友嘅 陳山聰 胡諾言 洪永城太太 梁諾妍 等，唔止會參與本地馬拉松賽事，日前仲齊齊去上海出戰《2026上海半程馬拉松》，相隔兩年再嚟上海比賽嘅山聰，亦喺社交平台分享相片同感受。
佢留言寫道：「快樂就係咁簡單，好耐冇試過一班人出外比賽，兩年後再嚟上海參加半馬，非常開心。」山聰最終以1小時46分鐘完賽，比兩年前快咗9分鐘，佢仲感謝一班跑友同佢一齊癲。
而有份同佢一齊落場嘅Inez，對上一次喺上海出賽已經係10年前，呢次再次重返上海半跑舞台，Inez都好興奮。佢仲摷返10年前出戰嘅片段同大家分享，當年Inez留住一把長秀髮，非常青春。山聰都忍唔住留言問：「請問長頭髮嗰係邊位呀?」，仲有網民大讚當年嘅Inez好似官恩娜，而老公洪永城亦抵死隔空留言發出求救，叫佢「快啲返嚟湊女」﹗
