一個藝人入行咁多年，唔多唔少都有啲黑歷史，蕭正楠 黎耀祥 同 曹永廉 呢日就作客《一周星星》宣傳新節目《他們的澳洲駕期》。當主持 潘盈慧 問到佢哋嘅黑歷史時，阿蕭就話一定係喺《愛美麗狂想曲》入面，以多角色咀阿廉嘅一幕！
阿蕭話由於要拍攝唔同嘅角色，所以佢要咀阿廉好多次，阿蕭正言：「難受一次就算啦，要難受咁多次！」而阿廉就追問對方有冇咀上癮。
坐喺佢哋中間嘅黎耀祥就反問阿廉點解咁多人咀佢，唔數唔知原來阿廉都同唔少男藝人拍過咀戲，問到佢咁多位拍檔之中邊個最好咀？阿廉認真諗咗陣就話黎耀祥係最好錫，佢仲好細緻咁同大家分享佢嘅咀後感呀！
《一周星星》星期日晚 22:05 翡翠台