林心如對囡囡近照曝光感無奈 形容霍建華為人對粉絲梳爽

林心如現身一個兒童公益活動，心如同老公霍建華一向都好保護囡囡「小海豚」嘅私隱，但近日小海豚嘅正面相意外被心如嘅朋友Po咗上網，令心如都幾無奈。而小海豚嘅身高亦受到大家關注，心如就話，囡囡已經有140cm，係屬於班上最高，一切都係歸功於好好瞓覺。

一眨眼小海豚已經到咗踏入青春期嘅年紀，不過心如就話，囡囡仲未到反叛階段，只係偶爾會頂下嘴，更笑言小海豚之前有留意BTS防彈少年團，但係認唔出成員邊個打邊個。被問小海豚覺得爸爸靚唔靚仔時，心如就話囡囡冇講過爸爸靚仔喇！

霍建華雖然為人低調，不過好錫Fans，早前仲請一班學生食早餐！心如大爆老公已經唔係第一次做呢種事，平時都試過請粉絲飲酒食飯。但自己嘅話就未試過，都只會係請朋友。