周柏豪 相隔7年終於兌現同歌迷嘅約定，呢晚喺啟德舉行音樂見面會，全場座無虛席，舞台亦打造成巨型遊樂場。柏豪唱咗近30首歌曲，有深情獻唱，亦有自彈自唱，聽到台下歌迷相當陶醉。
柏豪呢晚雖然狀態大勇，但原來喺開騷前，柏豪嘅小朋友相繼病咗，為免影響演出，柏豪亦聽太太建議，自己搬咗去酒店住兩個星期，但最終柏豪都係難逃一劫，搞到失聲仲要打針食類固醇，好彩最終順利完成演出。講到全晚最驚喜嘅，莫過於好友 鄭融 現身觀眾席，本來打算低調嚟睇show嘅阿融，雖然素顏上陣兼且箍緊牙，但都順應觀眾嘅要求，同柏豪即興唱咗佢哋嘅合唱hit歌《一事無成》，即時引爆全場回憶殺。
話晒呢個係一個音樂見面會，所以有歌聽之餘，柏豪亦都好重視同歌迷嘅互動，佢更邀請幸運兒上台玩遊戲，見到歌迷熱情支持，柏豪喺獻唱歌曲《同行》時都幾度強忍淚水。明年就係柏豪出道二十周年，柏豪話佢有計劃入紙紅館申請開演唱會，雖然未能成唔成事，但佢話都會一試。
