首位喺《唱錢》成功挑戰 Monster 關級，贏走十萬現金獎嘅素人靚太Mani，被網民封為最強素人，佢唱《一枝花》嘅片段亦於網上瘋傳。
呢位最強素人日前開咗個IG account，原來靚太Mani全名為馬敏莉，佢喺IG嘅首個post就係分享自己嘅日常四眼Look，笑言自己無論喺台上定台下，佢嘅台風都係咁騎呢。
Mani又分享咗參加《唱錢》嘅感受：「多謝tvb🙏🏻同埋ailpay🙏🏻比左(咗)一個咁好既(嘅)機會我一個無台風既(嘅)人震住打贏怪獸monster🥳🥳」佢喺帖文中亦感激Eric Kwok、森美、Desta、節目組嘅監製及眾工作人員，因為大家都好努力咁令佢放鬆，畀咗好多鼓勵佢。
日前Mani重返TVB領獎，佢笑言自己返到呢個令佢緊張到面無表情嘅舞台，見返晒所有台前幕後嘅人，見到大家都戥佢開心嘅感覺真係好正，不過Mani話自己又相當後悔，因為怕羞而唔敢問大家交換聯絡方式。Mani指自己當初自己符符籙籙咁填表參賽，以「來都來了」嘅心態去參加初選：「最後真係殺到埋嚟驚到心跳聲都爭啲入埋mic做伴奏🤣打倒monster個刻我終於明白原來真係會想喊ga😭原來緊張係會肚痛ga😆」。
Mani指《唱錢》令佢嘅人生有一個好好嘅回憶，同時佢亦鼓勵好似佢一樣咁細膽但又想追夢嘅朋友，要勇敢踏出第一步，因為試過即使衰咗都無悔呀！
