《第19屆亞洲電影大奬》圓滿落幕，國際影后章子怡獲頒「卓越亞洲電影人大獎」，呢次更係子怡繼2014年憑《一代宗師》奪影后殊榮後再度喺呢個頒獎禮得獎。子怡形容呢次得獎含金量更重，心情亦更放鬆。子怡就話，以前嚟香港時會有狗仔隊跟，但而家已經完全唔見，加上日前出席香港電影編劇家協會頒獎典禮受訪時，媒體都好親切，話題焦點都喺電影上，令佢輕鬆唔少。
子怡曾經執導電影，佢就話導演工作好辛苦需要一邊演出一邊睇Mon，會有精神分裂感覺，但如果遇到好劇本都會想試下再做導演。而喺演員身份時，就想挑選有靈魂和有趣嘅角色演繹。
劉俊謙成為今年「亞洲飛躍演員獎」得主，阿謙嘅慶祝方式就係同分隔異地嘅老婆蔡思韻打視像電話慶祝一下！阿謙仲話，自己好想解鎖編劇同導演身份，自己亦已經寫好一個故事，進入初階段籌備中。
同場出席頒獎禮嘅仲有內地男星劉昊然、今屆青年大使許恩怡、台灣演員蔡凡熙、泰國男星洪天逸。榮獲「AFA新世代獎」嘅劉昊然就形容呢個獎係佢入行12年嘅肯定，入行最難忘就係兩年前同周潤發合作拍戲，因為自細就睇發哥嘅戲大，演員之路亦受發哥影響。好開心可以得到發哥指點，當時亦一齊晨跑，佢仲應承發哥會嚟香港跑一次半馬。不過呢次行程時間緊湊，就未必見到發哥。
