台灣天后 蔡依林 啱啱完成一連兩場廈門站「PLEASURE」世界巡迴演唱會演出，因為不可抗力因素，內地站演出嘅大型道具已經做出大幅度改動，不過呢啲新道具似乎唔太俾面Jolin，兩日嘅演出頻頻出狀況，令Jolin飽受驚嚇。
好似「真相之書」環節，Jolin企喺挖空嘅書本裝置唱歌，書隨旋律翻頁，但揭揭吓就突然揭過頭，令Jolin向前彈咗一下，要急急扶著側邊；而「愉悅之舟」行進時就有嚴重晃動，令佢似坐海盜船咁；另外「時鐘轉盤」嘅分針故障唔郁，下降時又突然撠一撠，令Jolin當場花容失色。
雖然大型道具狀況冇停過，不過Jolin短暫驚嚇過後就恢復淡定，就算企喺晃動嘅小舟上依然繼續跳舞，有現場歌迷形容天后實力在線：「遇到機件故障竟然連一個音都沒落下」，敬業態度同舞台實力完全不負天后美名。 近年演唱會大型道具故障事件頻傳，今次Jolin仲更遇上連環故障，令現場歌迷睇到心驚膽戰，影片喺網上流傳後歌迷頻頻要求主辦方要加強舞台安全，賺錢之餘更應該將歌手嘅人身安全擺喺第一位。
