吳若希曬同偶像孫燕姿陳年合照 計錯數被網民嘲笑展現高EQ

新加坡天后 孫燕姿 完成兩場香港演唱會，吸引到唔少圈中人包括陳奕迅、梁詠琪等到場支持，當然都包括燕姿嘅忠實粉絲 吳若希 ，Jinny仲興奮貼出2014年即係對上一次燕姿喺香港開騷同偶像嘅合照，不過就因為計錯數鬧出笑話。事關2014到今年2026應該係相隔12年，但Jinny就計成16年，搞到大批網民留言笑佢數學差，不過Jinny都展現出高EQ，仲自嘲認自己係「數學天才」。 

第二日Jinny再接再厲，再貼出同偶像新鮮出爐嘅最新合照。不過就唔同於16年前，Sorry，係12年前靦腆怕醜嘅小粉絲樣，今時今日嘅Jinny笑得非常燦爛。佢仲開心寫到「唯一一個可以讓我在看完演唱會後會想嚎哭的歌手，謝謝你#孫燕姿，下一個演唱會可以不要隔那麼久嗎？」

不過網民似乎冇諗住要放過Jinny，繼續留言笑佢「16年後再睇」、「計啱數就應該快少少有得睇」，就算網民點mean都好留言都好，相信都唔會影響Jinny追星成功嘅好心情。