嚟緊六月 譚輝智 同 羅啟豪 將會由中聲舞台轉到首踏紅館台板開演唱會。輝智同Ramon呢日喺記者會除咗互送小禮物為大家打氣之外，仲送咗一個古典鋼琴音樂盒畀音樂總監 趙增熹 。
能夠一圓紅館夢，輝智同Ramon覺得好似發夢一樣，為咗帶畀歌迷精彩嘅演出，佢哋呢排成日開會構思Rundown，預告會送上升級版嘅舞蹈，輝智話《屈到病》隻舞已經Out啦，佢哋upgrade咗，輝智仲強調今次唔再玩呢啲，總之要夠型，佢都會豁出去。
要型就唔少得要騷下body，雖然輝智同Ramon都有好努力咁去做gym操肌，不過輝智就好似有一個疑問，就係「其實開騷點解一定要係有肌肉呢？我哋兩個可以專登去bump肥，我每次都想有啲唔同。」
咁難得可以喺紅館開演唱會，輝智同Ramon當然有好多嘢想騷吓quali啦，輝智就話自己就好想除衫，好想效法韓星唱唱吓歌，突然「拔」啲嘢出嚟，搞到訪問佢嘅 潘盈慧 好好奇，究竟輝智想拔啲咩呢？輝智就好抵死咁話：「拔支咪呀﹗」