陳自瑤呢日首度喺廣州舉行音樂見面會，吸引唔同地方嘅粉絲嚟支持，令佢特別興奮，為咗唔會令觀眾失望，Yoyo開騷前特別苦練歌藝，結果真係超乎想像，名副其實演得又唱得，台下反應熱烈。
好姊妹 姚子羚 亦有現身支持，兩人企埋一齊時令人勾起多年前嘅回憶，因為佢哋係青春偶像劇《四葉草》系列嘅女主角，一晃眼已經相隔廿幾年，但Yoyo同子羚合體時冇咩歲月痕跡，兩人合唱一曲《談情說愛》表達姊妹情深，子羚仲為Yoyo壯膽，分享舞台經驗，而Yoyo則分享子羚係佢第一位觀眾，又陪佢練歌又給予好多鼓勵。
喺演唱會上Yoyo仲出土25年前嘅包包面照片及童年成長片段，Yoyo由小朋友到做咗媽媽依然保持青春可人。而呢次嘅騷亦有笑有淚，因為Fans特意製作咗一條片段，又上台向Yoyo真情告白，令Yoyo感觸爆喊，完騷後Yoyo立即分享感受，就好似放下心頭大石一樣。
