周吉佩與張與辰繼今年期間限定以「良辰吉日」結合，化身星級導遊玩轉大馬，呢次帶領200幾位fans去台灣，由台中玩到台北，兩位仲喺當地舉行音樂會，令一眾團友非常high呀！
吉吉好開心見到兩班fans好融洽，希望可以一路去唔同地方、一路帶住fans玩落去。吉吉今次最難忘係坐與辰電單車穿越台北鬧市，與辰以前喺馬來西亞揸車，呢次揸電單車一開始係驚，完全冇嘢隔住，同其他車距離好近，不過佢都覺得幾懷念。
fans大飽耳福，吉吉同與辰就趁機大飽「口福」，抽時間去夜市嘆美食，與辰一個箭步衝去買臭豆腐，吉吉即嗌好臭，最終為與辰獻上第一次，吉吉首嚐大讚好食。與辰此次旅行狂食，吉吉就刻意節制一下，期間更抽時間做運動，話上次去大馬返嚟要操fit「還債」。
