《四葉草》系列青春劇係唔少90後嘅童年回憶，近日陳家樂喺社交平台分享一張《盛裝舞步愛作戰》嘅演員聚會照，衛詩雅、趙碩之、李蘊等都有現身！
家樂唔只將聚會相拼埋當年海報做對比，仲將因事未能出席聚會嘅洪卓立P入相中，真係好鬼馬，勾起唔少人青春回憶。 家樂以「入行後第一班戰友」形容呢班舊拍檔，佢表示：「咁就18年，入行後第一班戰友，大家都成熟咗好多，經歷咗好多，但一相聚，我哋又變番18年前嘅小伙子。」
從相中可見，雖然大家比當年成熟唔少，但仲係好有活力，一啲都不遜色於當年，喺文末更寫道「敬我哋嘅成人禮，敬親愛既Wilson」，家樂向已故監製錢國偉致敬。
至於阿Ken雖然未能現身，但佢有喺限時動態分享呢張舊劇照，喺限時動態撰寫心情：「看到這張Poster就有很多回憶浮現，當時白紙一張，什麼都不用管不用理，每天開工都是開開心心地騎馬。」
