劇集《重案解密》監製梁家樹率領劇中演員岑麗香（香香）、朱晨麗（朱朱）、譚旻萱（Mandy）、陳嘉寶（Anjalia）、何嘉莉（Lillian）、洪永城、林子善及陳少邦等亮相「寰亞之夜」Party。新劇改編自香港過去15年間，全城矚目嘅真實奇案，並以單元形式呈現，再由男女主角苗僑偉與香香貫穿所有故事線。
洪永城與陳少邦劇中飾演同袍，一忠一奸，洪永城爆：「我係一個做咗好多壞事嘅人，喪盡天良，當然做嘅時候就覺得自己好有型，點知其實係做緊啲好唔正確嘅事，最終俾三哥（苗僑偉）同香香治理我，同埋『搞掂』我！」
朱晨麗透露其劇中角色亦有大反差，本人都感到毛骨悚然：「劇中我叫『瑤瑤』係一個好善良嘅媽媽 ，遭遇一啲事後性情大變，希望俾觀眾見到另一面嘅朱晨麗。最大挑戰係連我自己都『嘩，有冇咁恐怖？咁變態？』」身旁嘅香香認證：「我有睇片呀，呢個人真係咁恐怖，做唔到！」而香香喺劇中角色叫嚴灼瑩，見盡所有好與壞嘅人，要變態有變態，有忠有奸。
子善爆料香香喺現場勤力背廣東話對白，劇本都被佢做嘅記號畫到五顏六色，最佩服香香同時仲要跟兩名阿仔視訊，香香笑言：「我係佢哋『做功課』好榜樣，其實我拍劇見到大家好開心，好想同大家傾偈，但我又怕忘記對白。因為我睇到劇本時心諗：『呢啲係咪人講㗎？』有一句對白好難，問咗一位現實生活做呢個職業嘅人，佢最初睇到都話『咁複雜嘅？』但佢講一次之後就話『係，真係咁講㗎喎！』所以真係要做好多好多功課，我由第一日收到劇本就開始背，佢哋同我傾偈我個腦都只有呢段對白。」
子善感謝監製梁家樹、「家姐」佘詩曼及梁靖琪（Toby）引薦其加入拍攝，子善透露劇中與三哥有家庭紛爭，劇情緊張刺激，而何嘉莉（Lillian）、陳嘉寶（Anjaylia）及譚旻萱（Mandy）同樣演出該劇，Anjaylia直指Lillian喺劇中氣場超勁，Lillian今次演嗰單都市傳說好恐怖，演出前做咗好多資料蒐集，佢希望原汁原味播出。
Anjaylia就為拍劇犧牲長髮，佢喺劇中貫穿唔同單元故事，最難忘係外地取景：「睇劇本已經覺得有啲故事真係好恐怖，期間要去喺外地取景，喺酒店住咗差唔多兩個月。夜晚喺酒店房睇劇本，我要屋企人或者朋友開視訊，要佢哋喺個鏡頭前陪住我，就算唔講嘢唔郁都得，有時睇完劇本都唔敢熄燈瞓。」