現居英國嘅著名音樂人雷頌德不時喺社交網站分享英國生活點滴，亦不時會回顧同唔同歌手合作嘅趣事。 最近阿Mark就分享，為黎明創作歌曲《喜》嘅由來。
阿Mark透露，曾經有段時間同Leon好鍾意打乒乓波，當時錄音室喺灣仔，二人經常偷偷去附近運動場打波，佢仲話Leon唔怕被人認出。 阿Mark亦提到自己喺中學時期就開始打乒乓球，亦會自己整乒乓球板，喺同Leon打波時因球技驚人而令對方靈機一觸，想用乒乓球構思新歌同MV。
阿Mark收到Leon「指令」後，開始創作歌曲《喜》，仲喺MV加入乒乓球同喪屍元素。佢仲話一開始聽到構思時，認為Leon唔係俾咗idea自己，而係搞亂佢思緒！ 不過阿Mark都覺得有時創作就係將冇關係嘅構思整合，先會有驚喜。
阿Mark重提拍攝MV當日，去到現場先發現咁大陣仗，Leon竟然搭咗成條街出嚟，又搵咗韓國舞蹈員同排舞師，完全係不惜工本。最後MV呈現出嚟完美，令大家好自豪。
