孫燕姿兩場香港演唱會日前圓滿落幕，呢次亦係燕姿相隔十二年再喺香港開騷，吸引陳奕迅、佘詩曼等藝人捧場。阿佘戴黑框眼鏡、身穿白色外套，打扮低調簡約，佢更被網民拍到興奮拎住螢光棒投入睇騷嘅樣，完全就係一個追星小粉絲。
除咗名人明星，燕姿家人呢次都有嚟捧場，所以完騷後，燕姿趁有時間都好好品嘗豬膶麵等美食，以及帶家人一齊去主題樂園遊玩一番，兼為媽媽慶祝生日。 燕姿喺社交平台分享多張玩樂照，以「It doesn’t get better than this. Thank you for an incredible and amazing time Hong Kong」做配文，大讚喺香港開騷呢幾日係「難以置信而驚人的時光」。
雖然曬家庭時光，但燕姿對囡囡同老公保護有加，所有合照都只係出背影相，同埋加上遮樣貼紙。呢次主題樂園之行，亦係燕姿為媽媽慶祝生日，兩老影合照時，笑到見牙唔見眼，睇得出好享受囡囡安排嘅行程。
