由杜德偉、賈曉晨、黃又南、梁雍婷等有份演出嘅奇幻電影，相隔八年終於面世。呢日一眾演員齊齊現身好友場宣傳活動，姜大衞同太太李琳琳亦係座上客。作品等咗咁耐終於可以上映，Alex同JJ都有好大感受。
JJ 更一邊睇一邊喊，仲話曾經覺得自己係咪揀錯路，明明有好好嘅事業，但放棄咗去生BB，但睇完電影後，佢就覺得即使可以重返當時，佢都會同當時嘅自己講「你做得啱」。
JJ近年主攻內地市場，慨嘆自己好似離香港電影圈好遠，其實一直都好掛住香港。JJ就話疫情嗰幾年日日喊住想返香港，佢希望香港電影越嚟越好，多啲人搵佢拍港產片。被問如果同老公樊少皇夫妻檔合作接唔接受到時，JJ笑言：「點會唔敢？可以報仇添！電影咩都可以做，幾多個老公都可以。」
Alex呢幾年雖然將工作重心放喺音樂事業上，但心底裡佢對拍戲仍然有團火，佢仲勾起以前為拍一套好戲捱更抵夜嘅熱血回憶。過咗咁多年重返香港影壇，真係百般滋味在心頭，亦發現自己係鍾意演戲。
