49歲韓國藝人金鐘國去年9月迎娶圈外女友，豪花約3000萬港幣於首爾買入別墅作為新婚愛巢。強健體魄嘅金鐘國正值新婚半年嘅蜜月期，竟然喺節目自爆患罕見病，要全程搭住成員哈哈（Haha）膊頭，攙扶勉強入場。
池錫辰解釋金鐘國近日身體狀況極度欠佳，金鐘國亦親口表示正受一種前所未聞嘅罕見病困擾，無奈表示「得了這輩子聽都沒聽過的病」，有傳係其耳蝸管出現問題，影響平衡感，需要靠人攙扶行走，但金鐘國依然堅持帶病進行錄影。
劉在錫開玩笑話叫佢返去都唔肯，之不過金鐘國話呢種罕見病只係休息約一個禮拜就可以痊癒，叫大家唔使過分擔心。而金鍾國早前喺網上頻道分享一條以「飯店早餐、運動」為題嘅影片，自律喺清晨6點於酒店健身房，笑言係蜜月第一日要爭取時間做運動，介紹酒店樓層時，鏡頭意外影到一位身材高䠷纖細嘅女子側影，與金鐘國之前透露描述「太太不愛健身、屬於天生瘦型」特徵相似，網民懷疑係金鍾國愛妻，金鍾國亦快速將影片下架。