薛家燕 呢日去到校園探訪，相當大受歡迎，個個小朋友大叫家燕媽媽，爭住同佢傾偈握手，一班小朋友仲識得一邊唱住家燕姐主演嘅經典處境劇《皆大歡喜》歌曲，一邊跳十字步舞步，氹得家燕姐好開心，最重要係佢哋小小年紀都認識家燕姐。
家燕姐除咗向小朋友分享之外，又接受校園小記者訪問互動，一班小朋友知道家燕姐就快76歲生日，仲齊齊唱生日歌預祝佢生日快樂，場面溫馨。一位口齒伶俐嘅同學仔問到家燕姐有咩生日願望同會點樣慶祝？家燕姐就大讚呢位同學仔好乖，若果做司儀拍得住曾志偉，非常搞笑。家燕姐又分享生日願望係世界和平，身心健康愉快，佢每日一起身都會對鏡笑一笑。
孫仔Julian亦準備咗份大禮送俾嫲嫲，人仔細細嘅佢表演慾十足，對唱歌、跳舞都好有天賦，家燕姐更大爆孫仔近日扮伯伯Look好搞笑，小朋友既然有呢個天份，就由佢哋去試吓，令佢哋會有優越感。
