天氣溫暖，又濕又熱嘅夏天好快又到，香港除咗雨量充沛，每年亦會受到多次熱帶氣旋嘅「探訪」，而呢啲熱帶氣旋其實係由聯合國亞洲及太平洋經濟社會委員會，以及世界氣象組織轄下共14個成員，包括柬埔寨、中國、朝鮮、香港、日本、老撾、澳門、馬來西亞、菲律賓、韓國、新加坡、泰國、越南同美國提供具地方特色嘅名稱嚟命名嘅。
天文台日前公佈，佢哋2023年舉辦嘅熱氣氣旋命名徵集活動，有幾個名稱最後獲大會採納，將成為未來其中一個熱帶氣旋名稱。而原來「點心」呢個對每個香港人都非常熟悉嘅名字，係由入行已30年嘅「六合彩之子」 蔡國威 所提議。
威仔當年就曾於社交平台，指自己報名參與名稱徵集活動，當時仲獲天文台頒發證書，而「點心」呢個名當時仲獲14000多位朋友投票支持。威仔近日就喺社交平台，經網友提醒先記起呢件事，真係威水。
佢仲寫道：「點心」將會代替「萬宜」呀，我真係超開心，有熱帶氣旋名係由我建議，Yeah Yeah Yeah，到時「點心」出現嘅時候，希望佢唔好太強勁，輕輕掠過就得㗎啦，唔好做成嚴重事故或傷亡就得，有一日休息下就梗係最好啦😂🥳🥰🙌🏼💪🏼🙏🏼
威仔主持六合彩攪珠多年，前前後後於兩間電視台總計主持時間已達19年半咁耐，係節目最長壽主持，佢又不時會參與《愛．回家之開心速遞》等戲劇演出，仲有大量活動司儀工作，工餘時間更會去捐血助人，更會參加唔同義工活動，好似早前香港有份協辦嘅全運會，佢就係其中一位義工副督導，更獲義工票選獲頒優質服務獎，非常犀利。
