漫畫家黃玉郎與其細37年太太Cass Fong日前疑被追債，有人影到寫住大堆黃玉郎欠債嘅追債街招喺銅鑼灣時代廣場隨風飄下，又有網民見疑似幾十張追債街招散落中環馬路邊。
街招內容涉指黃玉郎騙取投資及爛賭，導致債台高築，有傳媒向黃玉郎查問疑被派街招追債一事，佢回覆指為商業糾紛，「非借錢不還」。
黃玉郎喺80年代一手創立玉郎集團，有傳高峰時期身家逾10億，後因過度投資而縮水，遇上股災曾欠半億巨債。1991年涉做假數訛騙公司3,000多萬公款，遭廉政公署拘控，被判入獄4年。 黃玉郎出獄後再次踏足商界，2020年傳出佢被入稟追債，涉及兩間財務公司欠債逾1,000萬。
黃玉郎與第一任太太馬夢妮以離婚告終，佢曾與多位才女及藝人相戀，與黎姿轟動一時嘅「忘年戀」，以及與倪詩蓓育有患自閉症嘅兒子；黃玉郎於2019年迎娶比自己細37歲嘅太太Cass Fong，婚後積極造人，原本打算去台灣接受試管嬰兒療程，已諮詢醫生及做好準備，Cass Fong起程前卻自然懷孕，成功喺黃玉郎70歲之齡誕下兒子。
