有「美國黃子華」之稱嘅 歐陽萬成 呢日現身戲院，出席棟篤笑電影嘅謝票活動。尹光、馮德倫、蔡蕙琪、梁敏巧等藝人都有現身捧場。Jimmy好感動自己嘅棟篤笑可以登上大銀幕，加上13歲跟隨家人移民時只係一個普通人，但而家周潤發、黃子華等等知名藝人都知道自己，睇自己嘅Talk show，令佢都好覺得好開心、好難以置信，真係衣錦還鄉。
Jimmy一向視黃子華係偶像，佢笑言喺電影中剪咗唔少子華嘅鏡頭入去，仲話想黐吓電影票房經常億億聲嘅子華嘅金糠。Jimmy都好想可以召喚偶像出山，一齊做返場棟篤笑，如果可以同子華開騷，佢就用免費拍子華嘅電影做交換。至於講到幾時會再喺香港開騷，Jimmy就話佢都好想，而家呢套巡演即將完成，好快就會開始投入創作寫新棟篤笑。
