久久未喺香港出席公開活動嘅 陳意涵 同新戲拍檔 張懷秋 同 林子閎 一齊現身香港影視博覽。對上一次嚟香港時意涵仲未結婚，今次佢就帶埋囡囡同行，兩母女仲去咗主題樂園玩得非常開心。
意涵指呢次同囡囡一齊睇咗煙花，加上係樂園20周年紀念，所以一切都好靚好難忘。自己對上一次去主題樂園已經係廿幾年前嘅事，呢次同囡囡去玩，自己好似比囡囡更開心。不過就唔係搵返失去咗嘅童真，因為童真失去咗就唔會再返嚟。
同樣嚟香港宣傳新戲嘅仲有 劉冠廷 同 孫可芳 ，今次套戲係佢哋兩公婆相隔多年再合作，仲要係第一次一齊出trip宣傳，原本可以寓工作於拍拖，但冠廷喺台灣食錯嘢，搞到要入急症，令佢出發前都好擔心會嚟唔到香港。不過孫可芳就為咗一飽口欲，狠心將老公留喺酒店，自己出去食雞蛋仔同生煎包。
