由汪明荃、姜大衞、黃宗澤等主演嘅劇集《風華背後》雖然已經煞科多時，不過一眾演員依然有keep住聯絡，日前佢哋「龔家」就由大家長 姜大衞 ，帶同黃宗澤、蔡少芬、鄭希怡、蔡潔、譚俊彥、蘇麗珊及涂毓麟一齊飯敍。
Yumiko、Bosco、蔡潔及John哥都分別喺社交平台晒出飯聚照，Yumiko喺帖文中表示：「戲拍完了，但龔家人還在繼續⋯ 🤘🏻」，而Bosco就話：「Happy 龔家 Gathering ， Happy dinner🎊🎊🎊」。不過喺佢哋之中，以蔡潔分享嘅照片最搞鬼，除咗有佢哋chock爆嘅擺pose相外，仲有佢哋扮鬼臉嘅照片，相中Yumiko完全拋棄偶像包袱，碌大對眼摵起自己嘅面珠墩，令隔住Ada嘅John哥見到都嚇到扁嘴指住佢；至於喺另一邊嘅Bosco，則揸流攤淨係指住Ada就當扮咗鬼臉。
蔡潔喺帖文中寫道：「開心相聚的一晚🥂袁曉純進入龔家啦😈謝謝風老闆請客🥰😘」透露呢晚由喺劇中飾演龔秀風嘅蔡少芬埋單。 
