近日推出新歌《成長是個陷阱》嘅 戴祖儀 ，22號再跌入陷阱嘅更深一層， 正式踏入29+2歲生日。壽星女Joey既有新歌，星期一起又有旅遊節目《他們的澳洲駕期》播映、佢參演嘅《正義女神》又即將推出，生日前一刻仲為《博愛歡樂傳萬家》行善演出，與老友 胡鴻鈞 合唱，非常充實。
其實演出期間，ENews已發現同直擊Joey嘅經理人把握時間，喺電視城停車場佈置佢嘅座駕，打算率先送上生日驚喜，不過人算就不如天算，Joey突然決定上車休息，就令忙到一頭大汗嘅經理人精心準備嘅驚喜提早穿煲。
雖然唔覺意將一番心意提早拆穿，不過壽星Joey一樣非常感恩，同日夜照顧自己嘅同事合照留念，而近日正投入另一新節目《轟炸味蕾的廚房》嘅佢，亦已提前獲幕後同事為佢慶祝，佢亦於社交平台分享話：Happy birthday to me🥰💕幸運的me有一班錫到我濃(燶)的人～💕
