梁詠琪 喺電影作品中嘗試不同角色尋求突破，日前佢就同電影《逆轉上半場》導演 黃柏基 到美國，應芝加哥電影節嘅第20屆亞洲躍動影展邀請，為電影節擔任開幕電影及領受「卓越演員大獎」。同場出席仲有新加坡電影《好孩子》導演王國燊及主角許瑞奇、韓國電影《破片》導演金成潤及主角吳嘉勳、以及日本電影《幻犬诳猫》導演森垣侑大。
今次Gigi榮獲亞洲躍動影展「卓越演員大獎」（Extraordinary Actors Award），Gigi表示「非常感謝大會畀我呢個卓越演員大獎，好開心得到大家嘅肯定。《逆轉上半場》係一部好值得推廣嘅勵志電影，見到現時各個地方嘅電影業都唔容易，我哋仲要更加倍嘅努力，好好拍電影，抱著電影中金句『只要一日唔認輸，就一日都未輸』嘅奮鬥精神，繼續為香港電影出一分力。」
對於能將《逆轉上半場》帶到芝加哥，導演黃柏基同Gigi都非常榮幸：「喺電影業不景氣嘅情況下，能夠將呢部充滿希望同正能量嘅電影帶到外地，除咗係推廣著我哋嘅香港電影，更希望為觀眾喺生活中注入新嘅能量。」 
電影播放現場，除咗華語觀眾外，更有唔少外語觀眾入場，其中一位觀眾更驚訝分享：「我要一邊看中文字幕一邊看電影，本來已經做好會睡着的準備，但我並沒有，反而看得非常投入，劇情牽動了我嘅情緒，呢部係非常熱血並值得入場觀看嘅電影！」對於觀眾們正面反應，導演同Gigi都感到對香港電影嚟講意義非凡，更承諾觀眾日後會拍更多電影，希望能夠再帶到芝加哥與大家分享。
