游飈遺孀3月21日以道教儀式為亡夫設靈，星期日靈柩奉移和合石火化。游太與11歲大女兒一早在靈堂打點，靈堂佈置簡潔，游太選用亡夫生前身穿西裝相片作遺照，靈堂橫匾寫上「德範長存」。
唔少圈中人送上花牌致祭，包括黎耀祥、胡杏兒、古天樂、林家楝、麥長青等，而當日負責送游飈入院嘅黃文標，以及佢嘅生前好友顏仟汶、歐瑞偉、李煌生、鄭世豪，仲有久未露面嘅黃鳳瓊都到場與故友道別。
黃文標指游太與囡囡心情比之前平伏，但生計面對困難，因為游飈係家庭經濟支柱。佢會協助游太打理游飈嘅環保公司生意，所有員工都留守公司繼續工作。講到同故友間嘅難忘事，佢就話游飈當年知道佢賣車，於是提議將自己閒錢借出供買新車，結果被黃文標婉拒，但自覺受寵若驚。
顏仟汶90年代曾與游飈合作，佢佩服游飈為家庭而另謀工作嘅勇氣，因為好多人一入娛樂圈就好難跳出去。講到游飈義氣事蹟，佢覺得大家睇游飈對待黃文標就已清楚，而最終亦由黃文標陪同送院，似係一種感恩。
顏仟汶直認擔心黃文標生計，更擔心對方健康狀況，因為柏金遜症無法逆轉，只能拖延。顏仟汶表示3月23號會陪黃文標到深圳做腦部檢查，亦因為好友獨居關係，佢已配備黃文標寓所後備匙，以便有事可隨時協助。