湯怡 呢日出席活動，與一眾中學生分享人生兼玩遊戲。講到同小朋友玩遊戲，完全難唔到育有一女嘅Kathy，佢平時除咗會陪囡囡周圍玩外，有時仲會帶阿女去野餐放電。
雖然囡囡只係得四歲，但Kathy話囡囡嘅觀察力太強，經常會喺唔經唔覺之間就會學咗好多嘢，搞到而家講嘢變得好老積，所以佢話而家自己講嘢都會小心啲，怕阿女學咗啲唔應該學嘅字眼。
除咗老積外，Kathy話囡囡仲好貪靚，唔只想著靚衫，仲會想學媽咪咁整指甲，Kathy笑言囡囡同佢自己細個時係一個極端，佢話自己細個好文靜唔多講嘢，所以都想囡囡比自己Outgoing啲。
