潮流界盛事ComplexCon周末一連兩日舉行，而兩日嘅音樂會中， 盧慧敏以唯一香港代表姿態登上亞洲博覽館舞台演出，同韓團BLACKPINK成員Jennie、組合ALLDAY PROJECT以及Crush等世界級巨星同場，Amy成為歌手僅一年，首次踏上國際性表演舞台，為來自世界各地嘅觀眾展示本地實力歌手氣勢。
Amy以一身黑色斗篷現身充滿神秘感，佢先獻唱自己「顏色系列」嘅廣東歌《白牆》，之後脫去斗篷完美身型演出代表作《Red Flag》同《粉月》、仲有西班牙歌曲《Dios Es Un Stalker》、Kali Uchis嘅《Moonlight》、Tyler, The Creator嘅《Sugar On My Tongue》以及盧凱彤䟠《囂張》共7首歌曲。
雖然表演只係30分鐘，但係Amy就親自挑選歌單，佢對歌曲編排、舞蹈、視覺效果等所有細節都一絲不苟，Amy更一直努力帶起現場氣氛，觀眾亦熱情高呼回應。
完騷後Amy非常興奮又感動：「呢一個係我人生第一次真正以歌手身份踏上正式舞台，好幸運湊合到一班好有熱誠嘅人。兩個月密集式工作同思考，仲有梳化服同公司團隊等，企係舞台上表演真係唔係一個人可以做到嘅事，所以好感激大家。之後嘅歌都可以考慮吓有呢方面嘅元素；而歌曲我就揀咗一首西班牙歌，主要係希望畀媽咪聽到，媽咪睇到會好開心。 」
Amy自評今次演出表現只得50分，希望自己會一直進步，又謙虛指參與ComplexCon係叨Jennie嘅光：「我知道嚟嘅人9成都係為睇Jennie，但係見到大家揸住BLACKPINK嘅手燈都會同我有互動、為我歡呼，俾咗滿滿嘅情緒價值我，令我好enjoy呢個舞台！」