謝霆鋒演唱會深圳站近日開鑼，細妹謝婷婷與外籍伴侶Mathew一家四口早前特意由加拿大飛返香港，就係為咗去深圳捧阿哥場，噚晚佢帶埋Mathew同寶貝女Sara一齊睇尾場！
由於現場極高音量可能損害嬰兒聽力，所以七個月大嘅細仔Brooklyn Milne未有同行睇騷，婷婷先去深圳站嘅pop up周邊商品店打卡，晚上就同Mathew一同進場欣賞阿哥嘅演出。當霆鋒坐機械臂升降台與環繞式飛船裝置上獻唱時，婷婷與Mathew化身小fans，揮動燈光棒兼興奮大叫，盡情打Call。
婷婷喺社交平台貼出與阿女嘅影片並寫道：「Tonight was beyond words. All of us together, watching Nic in his element… I will remember this forever.（今晚一切係難以用言語形容。我哋所有人聚埋一齊，睇Nic盡情展現自我……我會永遠記得呢刻）。」
片中見婷婷寶貝女Sara戴住口罩、手持LED燈光棒喺台下為舅父霆鋒應援，Sara跟婷婷一樣笑起上嚟有一雙充滿親和力嘅「腰果眼」，非常可愛！