東張女神出嫁！吳幸美近年主力負責主持《東張西望》為市民伸張正義，去年初被爆封盤時，已獲不少網民送上祝福，今日幸美開心宣布已婚，許多網民開心到好似「嫁女」咁，祝佢永遠幸福、百年好合！
幸美今日接受TVB娛樂新聞台訪問，透露跟男友拍拖年幾就決定結婚，嚟緊以全新人妻身份主持《東張》，繼續努力工作，佢跟另一半好有緣份，識對方時已認定對方，幸美覺得另一半善良老實、三觀一致，每日過得開心，過咗年幾就想結婚，由於另一半係圈外人，所以婚事低調進行。
幸美喺社交平台貼出簽紙儀式及婚宴嘅照片，相中見佢搵咗謝偉俊律師證婚，久未公開露面嘅白姐姐白韻琹亦現身到賀，幸美開心寫道：「相愛 、相依 、相守 、直到白頭❤️ Mr&Mrs 👰🏻♀️🤵🏻🎊💍💕22/3/2026 我會與另一半攜手努力，共同建立屬於我們的家🏠💪🏻❤️🥰 #blessing #thanksgod 😇❤️」
一眾圈中好友李思捷、安德尊、王俊棠、肥媽Maria Cordero、黑妹李麗霞、李龍基、方伊琪、譚玉瑛及Joe Junior等出席婚宴，肥媽同黑妹亦即場獻唱助興！
幸美於圈中打滾23年，由於佢係家中獨女，年紀輕輕就要孭起成頭家，以工作行先，一星期做足6、7日，晚上亦甚少應酬，不用工作便留家，幸美早年曾表示喺求學時試過puppy love，入行後只拍過一次散拖，直至去年初「封盤」，幸美曾被周刊影到與伴侶十指緊扣喺將軍澳拍拖行街，全程咀個不停。
