黎明紅館演唱會星期日晚起於紅館展開，Leon一連十晚帶領觀眾感受集視覺、聽覺、觸感嘅音樂派對。Leon嘅繼續毫不吝嗇製作，今次更大手筆向每位觀眾送上「紅蘿蔔」手燈，歌迷紛紛同手燈selfie，更有人指不捨拆盒。紅館出現一片「紅蘿蔔」燈海，配合多首耳熟能詳嘅「明曲」，歡呼聲、尖叫聲同歡笑聲震撼紅館。
舞台上嘅巨型屏幕就由十多個唔同大小嘅立體屏幕組合而成，令視覺更立體，加上場館內接近 200支雷射燈，打造強化版雷射天幕，於強勁節奏音樂躍動下，令觀眾視覺、聽覺官能更為刺激。
演唱會一開始就播出3分多鐘動畫短片。除咗之前宣傳出現過嘅「獨眼兔」外，仲有新角色「白巫女」、「黑魔王」等。而Leon就以一身船長look登場，配合新歌《共你趕到這班車就是傳奇》為個唱揭開序幕。
Leon演唱《夜夜夢中見》時，漫天泡泡氣氛浪漫；而部份歌曲好似《聽身體唱歌》等運用環迴立體聲，配合天幕射燈，將紅館變成大型Disco，氣氛High爆。
壓軸部份Leon獻上《眼睛想旅行》、《Sugar in the Marmalade》同《我的親愛》Medley，仲有八隻牛牛上台一齊跳舞，屏幕就出現七彩城堡，打造一個開心歡樂嘅氣氛。Leon謝幕時仲笑指：「好開心今晚同大家可以眼神交流，聽日返工就返工、返學就返學啦。或者大家有唔同嘅煩腦，開心去面對啦。」