TVB新劇《正義女神》將於3月30號首播，一眾演員 佘詩曼 陳煒 蔣祖曼 周嘉洛 等拉隊到惠州宣傳，成個商場都迫爆粉絲支持，有Fans更特別帶埋阿佘最鍾意嘅公仔，配襯上阿佘劇中造型送畀偶像，氹得阿佘驚喜又開心。
阿佘同煒哥今次首度合作拍劇，兩位女神唔只美貌保持得好好，就連演技都一樣出色，阿佘更大讚煒哥有超強記憶力，深刻記得有場戲兩人加埋有一百頁紙對白，簡直考演技又鬥記憶。而煒哥就覺得有阿佘嘅帶動下所有人都唔敢心散好集中，阿佘笑指因為自己都太多對白要記唔得閒玩。
劇集亦係已故藝人許紹雄嘅遺作，雖然Benz已經離開人世，但佢熱愛演戲嘅精神仍然同在，阿佘都好掛住Benz，勾起片場相處點滴，而當煒哥睇到Benz社交平台依然運作宣傳劇集時都好感動。
Joman同嘉洛飾演兩姊弟，特別係嘉洛擔演嘅年輕法官，打破佢搞笑傳統要嚴肅上陣，同過往好大差別，更獲唔少網民稱讚佢個造型好靚仔，搞到佢有啲心虛。而Joman則搣甩硬朗一面，做位感性嘅感化官。
法律系畢業嘅 戴祖儀 對投入角色好大幫助，雖然現實未有機會喺呢個職場發揮，但喺劇中佢就可以一嘗做檢控官嘅滋味，夢想成真。
《正義女神》3月30號起 星期一至五晚 20:30 翡翠台