為TVB全新節目《Grand住享樂人生》擔任主持嘅 高海寧 呢日聯同節目嘉賓 陳曉華 黃佩霞 陳嘉容 等出席記招，佢哋分別喺「環球旅遊體驗」、「運動科技潮流與健康」以及「培育精英新生代」三大面向，分享點樣Grand住享樂人生，高Ling同Hera都話拍呢個節目，令佢哋有不一樣嘅難忘體驗呀。
高Ling話今次喺香港拍攝自己好開心：「因為好多時我哋未必有時間周圍飛，而香港都有好多好Grand、好獨特嘅體驗。」高Ling預告同Hera去咗全世界最高嘅酒吧，原來呢個酒吧日日都要排幾個鐘隊先有得入，今次拍節目當然就可以享受小小特權啦！
講到獨特嘅體驗Hera呢次就有機會出海，參觀豪華遊艇享受尊貴嘅待遇，令Hera都大開眼界：「上面嘅設施好靚、好華麗，我自己都已經幻想到如果有機會出海嘅話會好開心，因為私隱度好高。」
高Ling一向以事業為重，但近年見佢不時都會放假旅行滑下雪，佢話自己越嚟越識得享受生活，真係要多得蘇民峰師傅呀！「我入行就識蘇師傅，已經10幾年，佢係我人生嘅啟蒙老師。」事關蘇師傅不停督促佢要多啲體驗人生，初時佢都唔明白箇中道理，但隨着年紀越來越大，先開始懂得工作同生活要平衡。
《Grand住享樂人生》星期六晚 20:00 翡翠台