香港電影導演會周年晚宴暨年度頒獎典禮呢晚隆重舉行，梁家輝獲頒最佳男主角、廖子妤（Fish）榮獲最佳女主角殊榮、舒淇得新晉導演獎，關錦鵬就成為榮譽大獎得主。而鄭保瑞執導《九龍城寨》系列電影續集，傳出由木村拓哉飾演角色，由吳彥祖頂上，鄭保瑞為易角事件開腔澄清，鄭保瑞斬釘截鐵講個角色一直只搵過吳彥祖。
家輝哥希望未來挑戰喜劇，雖然年紀係60+++，佢笑言喺演藝生涯再嘗試喜劇，到時可以直接挑戰星仔，家輝哥又話演戲拍檔係需要互相撞出火花，冇話特別去諗同邊個合作。
舒淇喺導演劉偉強手上接過獎項，更被重提30年前飲醉酒遲到耍大牌趣事，呢次得獎令舒淇好感觸，之不過致謝辭時就提漏咗老公馮德倫，舒淇發揮跟老公一向幽默相處mode，舒淇笑住話諗住等到年尾一次過先講，費事次次都提，覺得佢會聽到好攰。
講到馮德倫早前扮嫌棄舒淇捧獎，仲話屋企冇位擺一事，舒淇就話屋企好大，呢個獎唔係好掗埞，嚟緊舒淇話唔再自編，如果要自編就又要10年，下一部現代啲，要等劇本出嚟先睇吓，再考慮有冇機會參演。
杜德偉同衛詩雅分別獲最佳男、女配角獎，杜德偉入行41年首奪電影獎項，佢覺得好震撼同興奮，完全冇諗過攞獎，杜德偉仲大曬恩愛，話太太係佢嘅一半，相信自己開心，太太係第一個感受到！
同場出席嘅有吳君如、陳可辛、惠英紅、鄭秀文（Sammi）等，君如呢日性感打扮好吸睛，原來呢個活動場地對二人別具意義。君如話1993年做導演會主持，當晚認識陳可辛，完場就去飲嘢傾咗成晚，陳可辛讚君如當年瘦同靚好吸引，君如聞言就話應該講欣賞演技好，陳可辛仲賣口乖話30年後君如都係一模一樣，仲瘦過以立前。
Sammi主演賀歲片票房破億，佢得知消息當刻感到好鼓舞，嚟緊「歡哥」黃子華想喺尖東搞「夜場」小食檔答謝觀眾。而惠英紅去年獲華表獎影后殊榮，佢希望奪得「三金」，目標係攞金雞獎呀！
