有娛樂公司宣佈將舉行25周年演唱會，更會總動員群星盡出，日前終極加場消息一出，搶飛大戰一觸即發。而身為公司招牌之一嘅孖公仔 Twins ，就繼金牌經理人 霍汶希 率領 張敬軒 同Gin Lee快閃快餐店任「奶茶大使」後，星期日就由Twins出擊接力，落區派奶茶實行將歡樂同奶茶一齊散播全城。
有fans於活動前4個鐘已現身等侯，快餐店亦貼心劃出特定區域舉行活動，不過場面仍如開show一樣墟冚。當阿Sa 蔡卓妍 同阿嬌 鍾欣潼 一現身，全場即刻陷入瘋狂狀態，二人隨即繞場一周派奶茶，粉絲就一直舉起手機瘋狂拍攝，爭取同偶像零距離接觸。
派奶茶之外，Twins又特別準備親自設計，印有「TWINS」Graffiti圖案嘅tote bag同小卡送予fans。大家滿載而歸，最後全場一齊大合照。
活動後阿Sa話：「好耐都冇同fans有咁近距離接觸，上次fans meeting都算近，但今次真係面對面咁，好難得。」阿嬌就笑指見到大家熱情唔捨得走：「希望演唱會時可以再同大家玩得更癲！」整個活動由頭熱鬧到尾，不少fans都說Twins又派又送勁有愛。