香港唱片商會日前舉行春茗，業界一眾唱片公司同實體唱片店負責人聚首一堂，會長鍾慧慧致詞時指近年黑膠唱片銷量不斷上升，而且越來越多樂迷重投黑膠唱片懷抱，亦同時享受逛唱片店、享受挑選音樂產品樂趣。年初佢仲往加拿大考察交流，接受當地電視台同電台訪問推廣「香港唱片店日」。
佢指香港唱片商會今年成立第44個年頭，宣佈《第三屆香港唱片店日》定於4月18日(星期六)舉行，希望各界同樂迷走進全港各區唱片店，透過發掘同購買實體唱片和其他產品嘅過程，親身感受當中魅力。
鍾慧慧稱今年唱片店日繼續得到唔少唱片公司支持推出限定產品，更贊助同授權珍貴母帶予唱片商會，推出獨一無二嘅專屬紀念精選唱片，於4月18日當日供樂迷消費換購，詳情將於紀念唱片曲目確實後透過官方渠道公布。
唱片商會同時時邀請香港電台第二台嘅 李志剛、商業一台嘅 余宜發 以及新城知訊台嘅 歐陽德勛 ，加上廣東電台音樂之聲嘅 歐信希 於春茗分享昔日逛唱片店嘅樂趣，四位電台主持人故事令現場年青一輩上咗寶貴一課，更理解守護實體音樂文化嘅重要性。
