肥媽 呢晚喺酒樓筳開五十幾席開Fans Party，修哥胡楓、黃錦燊、劉培基、周美鳳、胡渭康、韋綺珊，以及人強馬壯嘅中聲Family都係座上客。中聲家族上埋台同肥媽一齊炸爆舞台，又唱又跳《愛情陷阱》、《暴風女神Lorelei》。
呢晚Party以上海灘為主題，肥媽雖然身穿旗袍，但佢越跳越狂野，連韓國女團BLACKPINK成員Rosé同Bruno Mars合作嘅《APT》都難佢唔到，令在座咁多位都睇得好開心。肥媽仲話，呢次同中聲家族一齊玩，真係好有一家人嘅感覺，仲話想同中聲家族搞返個演唱會。
雖然每個人嘅裝扮都好貼合活動主題，但張佳添一身丁力經典西裝Look，再加上特登黐鬚真係誠意十足。添sir就話大家可以搵返佢阿叔張沖嘅相片對比一下，因為張沖真係有咁樣嘅鬚，仲真係上海人，令肥媽都話:「個個都話佢扮丁力，原來係扮張沖！」同樣落力打扮嘅仲有沈宗賢、劉曉昆，至於顏志恒就被肥媽話「唔出力」，今年竟然冇特別打扮，Benson就話，自己扮一個現代上海人。
