曾於《九龍城寨之圍城》扮演「魚蛋媽」被虐打而成為電影焦點之一嘅 李紫僖 ，出身自浸會大學電影系。佢唔止係電影、舞台劇演員，更曾為唔同電視劇撰寫劇本，正式係周身刀。最近佢仲以紫匯文化媒體行政總裁身份，與多間市場推廣同娛樂集團簽訂合作協議，逾百位商界、影視界製作人同藝人到場支持，場面熱鬧。
李紫僖同創意總監梁鎰康指，公司除香港總部外，於北京、廣州、深圳都設有辦公室，唔止參與影視作品製作同投資，連AI短劇同視頻、展覽、活動策劃、新媒體、甚至藝人管理同網紅資源都有涉足。
曾於北京中央戲劇學院進修嘅 李紫僖 話，期望公司透過跨界協作，為影視同文化產業注入新動力。至於曾參與《老表，你好嘢！》、《蜀山戰紀》等編劇作品嘅創意總監 梁鎰康 經驗豐富，合作過嘅藝人包括 王祖藍、吳奇隆、王晶等等，佢稱公司將參與更多優質影視內容創作，包括新興AI短劇結合新媒體同網紅資源，拓展更大可能性。
