周杰倫 相隔4年終於有新專輯面世，佢特登喺戲院舉行新專輯記者會，同時亦係新歌《太陽之子》MV全球首映。
周董以黑色Deep V西裝現身，胸肌若隱若現，好明顯係佢近年熱衷打網球嘅成果。周董心情大靚，原本未安排傳媒訪問，但周董主動提出訪問環節同大家近距離傾偈，至少10年無接受傳媒訪問嘅佢話感覺好似見到老朋友，日後都可以增加訪問機會。對於舉行簽唱會問題，佢笑言可以考慮移師到網球場舉行。
記招上率先播放兩首歌嘅MV，不過周董就預告好快會有另一個重磅MV登場，當中將會收錄佢當年嘅浪漫求婚片段。周董指創作時無呢個考量，但細閱歌詞內容後就覺得太夾，所以就有呢個收錄求婚片段喺MV內嘅決定。
另外仲有一首歌描述佢對子女嘅愛，周董亦難得分享同愛女嘅相處日常，佢話囡囡會主動幫佢化妝，有時更被女兒搞到好似神經錯亂一樣。
