TVB全新節目《魔音女團》，日前公布咗16位入圍嘅練習生名單，佢哋隨即展開一連串特訓，而擔任助教嘅 文佐匡 同 冼靖峰 ，就帶領其中8位練習生 倪嘉雯 邢慧敏 宋宛穎 倪樂琳 鄧凱文 俞可程 盧映彤 同 王汛文 進行兩小時舞蹈特訓。
要喺咁短時間學識一隻舞，絕非易事，不過，有跳舞底子嘅宋宛穎同曾為女團成員嘅倪樂琳，舉手投足充滿自信，更被指表現亮眼，兩人指要兼顧舞步、走位同表情管理非常困難，稍後要跳唱更係一大挑戰。
至於倪嘉雯同邢慧敏一樣都好比心機去練舞，雖然舞技稍遜一籌，年齡亦都已3字頭，但佢哋就話自己勝在心智夠年輕，完全唔擔心年過三十係組女團嘅阻礙。刑慧敏更指現時好多弟弟都鍾意姐姐，所以有一定市場。
而唔擅長跳舞嘅鄧凱文同俞可程，就話經過地獄式舞蹈特訓後，自信心都跌到落谷底，因為全程被笑到面黃，惟有繼續努力。
