黃宗澤、蔡卓妍、呂良偉，鄧萃雯、陳松伶、梁琤、關心妍等呢日現身一個盛大嘅馬拉松活動，連台灣女神林志玲同藝人黃曉明都特別來港參加，一齊響應健康生活。
阿Sa雖然唔算運動達人，但閒時會打網球、行吓山，加上有位健身教練男友，當人人都以為佢喺運動方面有大躍進，阿Sa就話男友實在太勁，對佢嚟講係另一個層次，自己平日亦唔會耽誤對方時間，即使一齊跑步都係各自跑，總會再遇見咁話。熱愛瑜伽同游水嘅林志玲，呢日以小背心短裙仔現身，唔單止少女味十足，仲元氣滿滿咁同大家打招呼，表示好開心可以來香港出席活動。
Bosco為咗今次嘅活動，事前專登去健身室接受教練嘅魔鬼拉筋特訓，佢痛到表情崩壞嘅相，仲引起唔少網民關注，不過Bocso就解釋其實一切惡搞都係教練所為，不過佢一向都好勤力去強身健體。
70歲凍齡男神呂哥外表同身形Keep得非常好，完全無半點老態，同呂哥健康養生之道有密切關係，佢仲分享左右腦活躍細胞神經有助健康，舉例日常即使用左手刷牙，也會交換用右手，自爆周潤發偶爾見面時會問佢係咪食咗防腐劑。
黃曉明近年除咗演藝工作，亦努力讀醫，並表示享受呢個年紀嘅樣子，考博亦係自己選擇，可惜去年冇考上，但佢冇放棄，笑言佢家族仲未出一位博士，佢想做家中嘅第一人。
