今個星期繼續由王鎮泉為觀眾送上最新電影資訊，話咁快嚟到200集，真係要再次多謝咁多位觀眾一直以嚟支持。觀眾期待已久嘅《魔海奇緣》真人版電影，最近釋出第二條預告片，今次大家終於見到大隻半神人茂宜嘅真人化面目。
由The Rock Dwayne Johnson飾演嘅茂宜今次同動畫版相比一樣咁大隻，塊面更加尖，相信連The Rock都估唔到自己咁多頭髮嘅一面，今次佢會夥拍飾演慕安娜澳洲新星Catherine Laga‘aia，展開一段奇幻海洋冒險，預計暑假就同大家見面。
王鎮泉呢集邀請到新片速遞嘅電影《爆血新婚夜2:豪門遊戲 》團隊做專訪。演員Sarah Michelle Gellar同Elijah Wood大談因為咩元素而加入呢個大家庭，知道電影六年後開拍新一集，仲有幸成為一份子，當睇到劇本時，齊集咗自己希望同喜愛嘅演員喺續集出現，比起第一集更引人入勝。
導演Matt Bettinelli-Olpin就講解喺佢心目中點樣分得出《奪命狂呼》定《爆血新婚夜》式嘅殺人，Matt Bettinelli-Olpin話奪命特別講求嘅係轉變節奏嘅思路，而爆血新婚夜嘅殺戮更粗糙，比較雜亂啲，有時帶啲超自力量元素。喺《奪命狂呼》系列中大部份角色離場後會被神出鬼沒嘅殺手追殺，而喺爆血新婚夜中，呢兩姊妹就會拼命避開槍殺同刺殺。
本周電影新片速遞係《爆血新婚夜2: 豪門遊戲》，電影承接上集，LeDomas家族一鑊熟後，觸發最高議會啟動全新獵殺遊戲，僥倖逃離「廝殺新娘」姬絲（莎瑪拉韋榮飾）隨即跌入血腥屠殺新階段！四大富豪家族誓要追殺姬絲，並綁架佢嘅細妹（嘉芙蓮紐頓飾）作為威脅，迫使姬絲入局，邊個成為最終贏家，就能夠統治世界！姬絲兩姊妹必須擸起武器大反擊，再次血洗豪門。
本周票房龍虎榜截至3月25日中午，第1位《狸想奇兵》、第2位《末日聖母號》、第3位《夜王》。